Wednesday, March 26, 2008

حبا فى الشعب المصرى

ياشعبي حبيبي ياروحي يابيبي ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي ينصب واحب اللي يكدب واحب اللي ينهب ويسرق تلال
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب البهايم واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك واذل اللي جابك وحيكون عذابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمااااال

10 comments:

Ahmed Al-Sabbagh said...

جميلة اوى يا أحمد

وبتعبر فعلا عن حالنا دلوقت اللى عايشينة

تسلم يا حمادة

بس انا قريتها قبل كدة حوالى عشرين مرة

بقت مستهلكة شوية ؟؟
;)

تحياتى لك
احمد

النجمة الصامدة said...

شكرا على مجهودك

مع اني مش بحب الاسلوب دا في الشعر خااااااااااااااااااااااااااااااالص

:)

آخر العنقود said...

واضح فعلا ان الكلام ده حبا فى الشعب المصرى
:))))

يارب صبرنا يااااااااااااارب

تحياتى ليك

Abd El-fatta7 said...

اكيد اللي قال الكلام ده بيحب شعب مصراوي

بيحبه بجنون

لدرجة ان بقاله 27 سنة بيموت فيه ومش عايز يسيبه برضو

ومن الحب ما ...قتل

سلامات ياريس

انسان بلا عنوان said...

معلـــــــــــــــــــــــــــــــــــــــــــــــم

كلام ف الجون

تحياتى
عمرو

Reham Mahmoud said...

بجد جميله جدا وعندك حق فى كل حاجة بجد بس انا عايزة اقول حاجة احنا شعب متخلف وعمره ماهيطورولا هيتعدل
ربنا يوفقك
تحياتى
ريهام

Hossam said...

hello ahmed,nice blog and nice words
hope c u soon
bye bye

النجمة الصامدة said...

اييييييييييين انت
؟!!!!!!!!!!

هنخلينا كدا كتير ولا ايه

انى احبكم فى الله said...

شكرا على المدونه الرائعه وياريت تزور مدونتى؟

fnoonh said...

مدونتك جميلة وانا قرات الشعر ده قبل كده بس بجد كل مابقراة بضحك جامد وبقول فعلا هما البالي بالك عاوزينا نكون كده بجد محششين ولا داريين بحاجة
تقبل مروري وان شاء الله اكرره وياريت تشرفني في مدونتي