حبا فى الشعب المصرى

ياشعبي حبيبي ياروحي يابيبي ياحاطك في جيبي يابن الحلال
ياشعبي ياشاطر ياجابر خواطر ياساكن مقابر وصابر وعال
ياواكل سمومك يابايع هدومك ياحامل همومك وشايل جبال
ياشعبي اللي نايم وسارح وهايم وفي الفقر عايم وحاله ده حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشي امورك كده باتكال
واحب اللي ينصب واحب اللي يكدب واحب اللي ينهب ويسرق تلال
واحب اللي شايف وعارف وخايف وبالع لسانه وكاتم ماقال
واحب اللي قافل عيونه المغفل واحب البهايم واحب البغال
واحب اللي راضي واحب اللي فاضي واحب اللي عايز يربي العيال
واحب اللي يائس واحب اللي بائس واحب اللي محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كوره وفيلم ومقال
واحبك تأيد تعضض تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلي مخك وتفتح جدال
وتبدأ تشاكل وتعمل مشاكل وتنكش مسائل وتسأل سؤال
وعايز تنور وعايز تطور وتعمللي روحك مفرد رجال
ساعتها حجيبك لايمكن اسيبك وراح تبقى عبره وتصبح مثال
حبهدل جنابك واذل اللي جابك وحيكون عذابك ده فوق الاحتمال
وامرمط سعادتك واهزأ سيادتك واخلي كرامتك في حالة هزال
وتلبس قضيه وتصبح رزيه وباقي حياتك تعيش في انعزال
حتقبل ححبك حترفض حلبك حتطلع حتنزل حجيبلك جمااااال

حال اهل فلسطين.....صور فقط

سؤال الحلقة

السلام عليكم ورحمه الله وبركاته

لقد طرحت سؤال وسميته بسؤال الحلقة ألا وهو ....... لوقالولك أنت بقيت رئيس جمهورية هتعمل إيه؟

وسألت ناس كتير كانت بعض الناس واخدة السؤال بجدية شوية وناس ثانية مش في دماغها حاجة

وكان في إجابات كتير متشابهة

المهم انا بقة جمعت بعض الإجابات عن السؤال دة وقلت لازم انشرها في المدونة بتاعتى

يلا بنا نشوف الإجابات:ــ

1ـ عبد الرحمن ياسين (صاحب مدونة أنا مصري)

اجابتة عن السؤال: أول حاجة من الناحية السياسية ....الجيش :هدخل فيه عناصر جديدة .....وأسلحة قوية .......

الوزارة .....هعين وزراء جدد جيدين....... حجات كتير هعملها لان كل عنصر في تكوين الدولة ...بيكمل العنصر إلي بعده الجيش ..ما يقدرشي يمشي إلا بالصناعة علشان مصانع السلاح والتجارة ما تقدرشي تمشي إلا بالصناعة...وهكذا

2ـ احمد البلقا(صاحبى المحترم من المنصورة)

اجابتة عن السؤال: اول حاجة هعملها.... تطبيق الشريعه الاسلاميه

3ــ د/عبد الرحمن (صاحب مدونة حسبى ربى )

وكانت اجابتة عن السؤال:هاعين العلماء بتوعنا وزراء وكل واحد فى مجاله

هاحبس كل الناس اللى هم سبب الفساد وعلى راسهم عز والعادلى

وهاقطع علاقاتى بامريكا واسرائيل

وهاخلى موارد الشعب فلوسها تروح للشعب مباشرة....زى قناة السويس

وبعد ماحس ان عملت نهضة اقتصادية واجتماعية..هقدم استقالتى

4ــ خالو احمد الصباغ (صاحب مدونة خاااالو احمد الصباغ )

اجابتة عن السؤال: هطب ساكت....بعد الشر عليك يا خاالوا

5ــ الشاعر/ احمد هلال( صاحب مدونة اجرى على الله)

اجابتة عن السؤال: حاسبلهم البلد وامشي...بس قبل ما امشى ...هخليهم يمسكوك بدالى...هههههه

ولكن بدأ فى الجد وقال:
انا لا اتمنى ان اكون رئيس جمهوريه لانها امانه اثقل من جبال الكون كله

لكن ان كان ولابد وانت مصمم يعنى

فأول حاجه حاعملها هو

a. اخلاء سبيل كل المعتقلين السياسين

b.محاكمه عادله لكل من توجه ضده تهمة فساد في العصر السالف ومحاسبة هؤلاء اللصوص الذين سرقوا البلد

c.اعادة الدعاه والعلماء والمفكرين المهاجرين من مصر خصوصا هؤلاء الذين تركوا بلدهم نتيجة البطش الامني

d.اعادة صياغة منظومة الاعلام حتى تخدم الانسان ... ربنا يعينك يا راجل يا طيب

6ـ النجمة الصامدة (صاحبة مدونة صمود)

اجابتها عن السؤال: هموت نفسى ... لية كدة بس

7ــ نونا (انسة محترمة جداا)

اجابتها عن السؤال: هاموت الشعب كله....لية دة شعب غلبان.... .ماهو علشان غلبان يموت

8ــ عثمان (صديقى من بورسعيد)

اجابتة عن السؤال: هرفض..... علشان هى مسئوليه و أنا مش مؤهل لها

9 ـ عصام (صديقى المبرمج)

اجابتة عن السؤال: هروق نفسي بالعقل...وبعدين... وهشوف الغلابة....والمساكين ...وهنع السرقة ...وكمان....هرخص الاسعار

10ــ ابراهيم (صديقى من الدقهلية)

اجابتة عن السؤال : هولع في الشعب المصري.... شكراااااا ليك يا هيما

11ــ محمد وحيد (صاحبى البرنس).....12ـ خالد (صديقى من المنصورة )..كانت اجابتهم متشابهة

الاجابة : هولع فى نفسى ..... قبل ما الشعب يولع فيا

واحنا فى انتظار اجابة حضرتى على السؤال اتفضل يا حضرتى ( صاحب المدونة اللى احنا فيها )

اجابة حضرتى : انا بقة هجيب عشر خطوط بزنس ونمرى هتبقى مع الشعب كلة هو يرن بس وانا هتصل بية ....ههههه

واللى معهوش رصيد يبعت بليز كول مى وبردة هتصل بية

والسؤال لسة مفتوح وعاوزين اجابات كتير و ممكن اقتراحات كمان عن اللى ممكن يمسك رئيس جمهورية لازم اول خطوة يعملها اييييييييييية نشوف وشكم فى الكومنت .........سلام

ناس ....اعوذ بالله

السلام عليكم ورحمه الله وبركاته

بصراحة الموضوع باين من عنوانه أنا النهاردة هحكيلكم على شوية ناس أعوذ بالله

كنت في ذات يوم راكبا القطار من الإسماعيلية متجها إلى بورسعيد المهم هو كان ميعاده 7.5 الصبح

هو كانت عربياته عاملة زى عربيتا المترو يعنى الكراسي على الصفين الحمد لله دخلت وركبت واتلاقيت مكان فاضي قعدت فيه شوية كده أتلاقيت راجل كبير وماسك عكاز رحت قومت أنا وقعدت الراجل مكاني

الراجل كان نازل في القنطرة رحت أقعدت انا بقة مش هفضل واقف طول الطريق يعنى مع انى بقف طول الطريق قليل اوى لما بقعد مش علشان اان بحب الوقفة لأ علشان مش لاقى مكان المهم انا قعدت واستريحت وكان فى مجموعة شباب واقفين قصادى وركب شوية شباب تانيين من القنطرة اللى هما الناس اللى اعوذ بالله ركبوا وفضلوا يزقوا فى الشباب اللى واقفين قصادى قفام واد من اللى واقفين قصادى قلهم براحة شوية يا كابن فى ناس قاعدة وإحنا فعصناهم رايح الواد يتاع القنطرة بصلة حتة بصة وعينك متشوف الا النور

سب دين وشتائم قذرة والواد يقولة طب والناس يا كابتن يسبلة الدين ويسب الدين للناس اللى قعدة

ورايح أتجمعوا على الواد الغلبان اللى كان واقف قصادى بتاع خمسة ستة من القنطرة ورايح اجه خمسة ستة
يحجزوا ضربوهم برضوا وشتموهم وكانوا مستحلفين للواد عاوزين يرموة من القطار كلة دة علشان قالة بالراحة يا كابتن المهم رايح ضربوا الواد وزقوه فى عربية تانية وكل دة وانا قاعد ركبى بتخبط فى بعضها واتلاقيت الواد بتاع القنطرة جاى يقعد على رجلى قعد شوية وبعدين فضلت اقولة يا برنس يابرنس يا برنس تعالى اتفضل حضرتك اقعد مكانى رايح قالى وسع حاسب رحت مصدقت انى قمت وجريت من مكانى بصراحة انا عوزكم انتو اللى تجكموا على الناس دى دة ناس اعوذ بالله هما اية مش عارفين انه فى ربنا ممكن يسخطهم كلهم

ولا حتى ممكن يموتوا فى اى لحظة ولا حتى ممكن نتقلب كلنا بالقطار ونموت كلنا يبقى استفادوا اية من الفتونة وقلة الادب اللى هما فيها ربنا يرحمنا جميعا بس طبعا اللى قرأ البوست دة اخد عنى فكرة انى جبان او غيره احب اقولة لالاوالف لالا

بالله العظيم لو كنت اتخانقت معاهم يأما قاتل يمقتول اةةةةة ههههههه

الصين ........غرقتنا

السلام عليكم ورحمه الله وبركاته

لقد انتشرت المنتجات الصينية فى السوق المصرية بطريقة فظيعة وبأسعار مذهلة

ولم تترك الصين اى منتج الا وشاركت فية حتى الجلباب والعمامة والسبح وسجاجيد الصلاة

وظهرت فى الاونة الاخيرة سجاجيد صلاة مرسوم عليها صليب ونجمة اليهود السداسية

ألهذا الحد وصل حال المسلمين بأن يقوموا بأستيراد سجادة الصلاة من بلاد الكفر؟؟؟

لماذا لا نصنعها بأيدينا نحن المسلمون؟؟

لماذا التكاسل؟؟

الم يحسنا الله تعالى على العمل؟؟

وقوله تعالى: {وقل اعملوا فسيرى الله عملكم ورسوله والمؤمنون}

أليس العمل فى خدمة الإسلام والمسلمين فهو فرض كفاية .؟؟ لما التخاذل؟؟

.والنبي صلَّى الله عليه وسلَّم يقول: «ما من امرئ يخذل مسلماً في موطن ينتقص فيه من عرضه،

وينتهك فيه من حرمته إلاَّ خذله الله في موطن يحبُّ فيه نصرته» أخرجه أبوداود في السنن

نعم يوجد تخاذل من البعض

ويقول سبحانه وتعالى فى الاية الكريمة

{ وقُلِ اعْمَلُوا فَسَيَرَى اللَّهُ عَمَلَكُمْ ورَسُولُهُ والْمُؤْمِنُونَ وسَتُرَدُّونَ إلَى عَالِمِ الغَيْبِ والشَّهَادَةِ فَيُنَبِّئُكُم بِمَا كُنتُمْ تَعْمَلُونَ } فقد ربطت العمل برؤية الله تعالى لهذا العمل ومجازاته عليه في الآخرة .

وقد أدى الضعف في فاعلية المسلم وحركته اليومية إلى وجود خلل كبير في حياة المسلمين

دة حتى حاجات الكمبيوتر اللى احنا شغالين علية دة معظمها صينى وفى مصر مش عارفين نصنع انى ثنج من الكمبيوتر

ولم ينتج الصينيون فقط بل انهم يروجون وينشرون بضائعهم

وانا قاعد فى امان الله فى البيت اتلاقيت الباب بيدق ق ق قمت فتحت الباب اتلاقيت واحدة صينية

بتقولى سلامو اليكو قولتلها وعليكم السلام قالتلى مش اوزين هاجة قولتلها عاوزين سلامتك

وكانت شايلة شنط ملابس وكدة يعنى ويبقى السؤال مفتوحاااااااااا أين مصر من هذا؟؟؟

هو احنا هنفضل لحد امتى مش عارفين نصنع حاجة

واخيرا قد نجحت الصين فى صنع قفاز رقمى كهرضوئى ذى حقوق ملكية فكرية مستقلة وهو الاول من نوعه

وهى عبارة عن يد مقلدة واحنا لسة مش عارفين ننتج قلم

بسم الله

السلام عليكم ورحمة الله وبركاتة
لا ادرى من اين ابدأ واكتب
ولاادرى ماذا سأكتب
ولمن اكتب هذة المدونة
بس وانا بقوم بانشاء هذة المدونة
كان يشغلنى امر هام بالنسبة لية
هو فى حد هيخش هذة المدونة دى غيرى
كان جوايا صوتين
صوت بيقول اةةةةةة
وصوت تانى بيقول تؤ
متتعبش نفسك هو الناس فضيالك
يعنى انت هتكتب اية
ودوت كان تانى امر شاغلنى اوى
وفجأة ....ظهر صوت قوى بداخلى يقول
اكتب ما بداخلك لعل الحلم يكون حقيقة
وطبعا ما صدقت وعملت المدونة واتمنى انها تكون مفيدة
وان شاء الله سوف تكون مطابقة لعنوانها
ـ ـ ـ(مواطن غلبان)ـ ـ ـ
سأكتب كل ما بداخل المواطن الغلبان وما يتألم منة المواطن الغلبان
وايضا
سأكتب عن كل الجوانب
دينى ــ سياسى ــ اجتماعى ــ اقتصادى
ويارب يستفاد منها كل البشر
وننفتح من خلالها بالاجر والثواب ان شاء الله
وجزاكم الله خبيرا