Monday, March 17, 2008

سؤال الحلقة

السلام عليكم ورحمه الله وبركاته

لقد طرحت سؤال وسميته بسؤال الحلقة ألا وهو ....... لوقالولك أنت بقيت رئيس جمهورية هتعمل إيه؟

وسألت ناس كتير كانت بعض الناس واخدة السؤال بجدية شوية وناس ثانية مش في دماغها حاجة

وكان في إجابات كتير متشابهة

المهم انا بقة جمعت بعض الإجابات عن السؤال دة وقلت لازم انشرها في المدونة بتاعتى

يلا بنا نشوف الإجابات:ــ

1ـ عبد الرحمن ياسين (صاحب مدونة أنا مصري)

اجابتة عن السؤال: أول حاجة من الناحية السياسية ....الجيش :هدخل فيه عناصر جديدة .....وأسلحة قوية .......

الوزارة .....هعين وزراء جدد جيدين....... حجات كتير هعملها لان كل عنصر في تكوين الدولة ...بيكمل العنصر إلي بعده الجيش ..ما يقدرشي يمشي إلا بالصناعة علشان مصانع السلاح والتجارة ما تقدرشي تمشي إلا بالصناعة...وهكذا

2ـ احمد البلقا(صاحبى المحترم من المنصورة)

اجابتة عن السؤال: اول حاجة هعملها.... تطبيق الشريعه الاسلاميه

3ــ د/عبد الرحمن (صاحب مدونة حسبى ربى )

وكانت اجابتة عن السؤال:هاعين العلماء بتوعنا وزراء وكل واحد فى مجاله

هاحبس كل الناس اللى هم سبب الفساد وعلى راسهم عز والعادلى

وهاقطع علاقاتى بامريكا واسرائيل

وهاخلى موارد الشعب فلوسها تروح للشعب مباشرة....زى قناة السويس

وبعد ماحس ان عملت نهضة اقتصادية واجتماعية..هقدم استقالتى

4ــ خالو احمد الصباغ (صاحب مدونة خاااالو احمد الصباغ )

اجابتة عن السؤال: هطب ساكت....بعد الشر عليك يا خاالوا

5ــ الشاعر/ احمد هلال( صاحب مدونة اجرى على الله)

اجابتة عن السؤال: حاسبلهم البلد وامشي...بس قبل ما امشى ...هخليهم يمسكوك بدالى...هههههه

ولكن بدأ فى الجد وقال:
انا لا اتمنى ان اكون رئيس جمهوريه لانها امانه اثقل من جبال الكون كله

لكن ان كان ولابد وانت مصمم يعنى

فأول حاجه حاعملها هو

a. اخلاء سبيل كل المعتقلين السياسين

b.محاكمه عادله لكل من توجه ضده تهمة فساد في العصر السالف ومحاسبة هؤلاء اللصوص الذين سرقوا البلد

c.اعادة الدعاه والعلماء والمفكرين المهاجرين من مصر خصوصا هؤلاء الذين تركوا بلدهم نتيجة البطش الامني

d.اعادة صياغة منظومة الاعلام حتى تخدم الانسان ... ربنا يعينك يا راجل يا طيب


6ـ النجمة الصامدة (صاحبة مدونة صمود)

اجابتها عن السؤال: هموت نفسى ... لية كدة بس

7ــ نونا (انسة محترمة جداا)

اجابتها عن السؤال: هاموت الشعب كله....لية دة شعب غلبان.... .ماهو علشان غلبان يموت

8ــ عثمان (صديقى من بورسعيد)

اجابتة عن السؤال: هرفض..... علشان هى مسئوليه و أنا مش مؤهل لها

9 ـ عصام (صديقى المبرمج)

اجابتة عن السؤال: هروق نفسي بالعقل...وبعدين... وهشوف الغلابة....والمساكين ...وهنع السرقة ...وكمان....هرخص الاسعار

10ــ ابراهيم (صديقى من الدقهلية)

اجابتة عن السؤال : هولع في الشعب المصري.... شكراااااا ليك يا هيما

11ــ محمد وحيد (صاحبى البرنس).....12ـ خالد (صديقى من المنصورة )..كانت اجابتهم متشابهة

الاجابة : هولع فى نفسى ..... قبل ما الشعب يولع فيا

واحنا فى انتظار اجابة حضرتى على السؤال اتفضل يا حضرتى ( صاحب المدونة اللى احنا فيها )

اجابة حضرتى : انا بقة هجيب عشر خطوط بزنس ونمرى هتبقى مع الشعب كلة هو يرن بس وانا هتصل بية ....ههههه

واللى معهوش رصيد يبعت بليز كول مى وبردة هتصل بية

والسؤال لسة مفتوح وعاوزين اجابات كتير و ممكن اقتراحات كمان عن اللى ممكن يمسك رئيس جمهورية لازم اول خطوة يعملها اييييييييييية نشوف وشكم فى الكومنت .........سلام


6 comments:

اجري على الله said...

سلام عليكم
رغم اني اتاخدت على خوانه والاستاذ ابراهيم قصدي الاستاذ احمد ماسألنيش نزيع ولا مانزعش لاكن ماشي انا ممكن ما سبش البلد ويالا حاحكمكم وامري لله
بس ماتقلقوش
انشاء الله حانلغي الدعم ونلغي العيش ونلغي التموين ونلغي كل المراكز القياديه ونلغي البني ادمين ونلغي المعارضه ونلغي كل الاحزاب
وانشاء الله اللي حايفضل اعده بمستقبل زاهر وبكره تشوف بعنيك


الشاعر بن هلال

Abd Al-Rahman said...

سؤال لذيذ جدا على فكرة
بس انت عارف ايه هو الالذ منه
ان احنا كلنا كده نبقى صحبة فى التخشيبة النهاردة
للاسف احنا اتعودنا ان ابداء الراى جريمة لاتغتفر
واسمع النكتة دى :
سألوا 3 اشخاص - مصرى ويابانى و صومالى -
قالولهم ايه رأيك فى انقطاع التيار الكهربى ؟
اليابانى قالهم يعنى ايه انقطاع لانه مش متخيل ان الكهربا ممكن تتقطع
الصومالى قالهم يعنى ايه تيار كهربى لان الاختراع ده ماوصلش لسة
المصرى قالهم يعنى ايه ايه رأيك ؟
سلام

آخر العنقود said...

اوبااااااااااااااا
انا طلعت من الناس اللى ماكانش فى دماغها
ياااااااااالا خير
اصل انا برده مش فى دماغك الرئاسة دى
الواحد اماله اكبر من كده
أنت عارف طبعا؟
:)

بجد بقى لو مسكت الرئاسة اكيد هغير حال البلد كلللللللله

او يعنى ممكن من الاخر كده امسكها لواحد يكون اد المسئولية
وما تسألنيش مين انتوا عارفين اكيد؟

تحياتى ليك
بس ابقى عرفنا ان الموضوع كبير كده ومعذرة على عدم الرد

ahmed fala said...

الشاعر بن هلال
وعليكم السلام ورحمه الله وبركاتة
هو مين الاستاذ ابراهيم دة ههههه
وبعدين مفيش خوانة ولا حاجة انا رجعت ظبط تانى اى خدعة

فعلا هو دة اللى ناقص

ربنا معاك

نورت مدونتى المتواضعة

ahmed fala said...

د/عبد الرحمن

ولو مبيتناش فى التخشيبة نبقى نصيف مع بعض ههههه
وخلى بالك حضرتك قولت ان الكلام دة على مسؤليتك اةةةةةةة
متجيش ساعتها وتقول لأ مقولتش حاجة ههههه

النكتة دى معناها كبير اوى وحلوة بتضحك بردو

شرفتنى بمرورك

ahmed fala said...

الفاضلة/ اخر العنقود

لالالالالالالالالالالا مقصدش خاااالص

كفاية ان حضرتك علقتى

اة طبعا عارفين مين ...انا طبعا ههههههه

نورتى بمرورك